O día trinta e un de xaneiro fomos facer unha ruta polo monte de Portas coas profesoras de lingua galega e de educación física. A verdade é que foi moi divertido e interesante xa que as dúas profesoras saben moitas cousas das plantas do noso lugar. Todas as plantas que atopamos xa as coñeciamos pero o que non sabiamos era que servían para mellorar a nosa saúde.
Algunha das plantas que atopamos foi a celidonia que é moi boa para curar as espullas, os herpes, as durezas e os calos. Chámeselle tamén "anduriñeira" ou herba da andoriña xa que se ten visto as andoriñas levala no bico para curarlle a vista aos pequenos paxariños no niño. Aquí a temos na foto:

Tamén vimos o romeu co que se poden preparar baños e se se toma en infusión axuda a curar enfermidades respiratorias. Outra das cousas interesantes que nos contou a profesora sobre o romeu foi que se se coce en auga e se bota polo cabelo elimina a caspa, vaia, esta planta serve para unha chea de cousas... Outra das plantas que nos sorprendeu moito foi o dente de león que é o da foto que tedes aquí abaixo.Os dentes de león poden ser de dúas clases: galos ou galiñas. Os galos son indivisibles; as súas partículas xamais se separan do talo. As partículas das galiñas,en cambio, son febles e sempre están dispostas a desunirse.


Pódese recoller en lugares limpos, picalo ben e mesturalo nas ensaladas xa que se pode tomar cru. Ten moita vitamina C e é moi bo para o fígado.
Ao longo da nosa ruta pasamos por un regueiro no que pasamos un bo anaco xogando a saltalo e tamén descubrimos unha planta que se chama berro. Aquí a tedes na foto.

A profesora díxonos que esta planta é moi boa para tomar en ensalada xa que ten moito ferro.
Ao pasar polos muros das veigas atopamos unha planta moi fermosa que se chama couselo, aínda que tamén é coñecida como embigo de venus ou lochita, a que ten un nome fermoso? Pois ben, esta planta ten unhas propiedades marabillosas xa que se a tomamos ou ben crúa ou ben fervida no leite, fortalece a nosa memoria; boa falla nos vai
facer para estudar para os exames!A seguinte foto é dunha planta que se chama gordolobo ou tamén chopo branco ou chupón. Aínda está sen flor porque non é tempo de florecer pero no verán bota un talo longo cheo de flores amarelas. É boa para curar frieiras e queimaduras e o seu aceite é bo para reparar o cabelo e as unllas.
 .
E nesta foto vemos a Martín rodeado dunha mimosa que están nesta época moi fermosas!!